Saturday, October 11, 2008

ഒറീസ കലാപത്തില്‍ കാണാതെപോകുന്നത്‌

ഒറീസയില്‍ ആഗസ്റ്റ്‌ 25ന്‌ വിശ്വഹിന്ദുപരിഷത്ത്‌ നേതാവ്‌ സ്വാമി ലക്ഷ്‌മണാനന്ദ സരസ്വതിയും നാല്‌ അനുയായികളും കൊല്ലപ്പെട്ടതിനെ തുടര്‍ന്നുണ്ടായ വര്‍ഗീയ കലാപം രാജ്യത്തിന്റെ വിവിധ ഭാഗങ്ങളില്‍ വന്‍ പ്രതിഷേധമാണു സൃഷ്‌ടിച്ചത്‌. കേരളത്തില്‍ നിന്ന്‌ പ്രതിഷേധമുയര്‍ത്താന്‍ ഇടതു-വലതുമുന്നണികളും മതനിരപേക്ഷ സംഘടനകളും യത്‌നിച്ചു. അപ്പോഴൊന്നും ഈ കലാപത്തിന്റെ കാരണമെന്തെന്നതിനെപ്പറ്റി ആരും അന്വേഷിച്ചില്ല, അഥവാ അറിയാമായിരുന്നിട്ടും അറിഞ്ഞില്ലെന്നു നടിച്ചു. കാരണം ക്രിസ്‌ത്യന്‍ വിഭാഗം പലര്‍ക്കും ഒഴിവാക്കാനാകാത്ത വോട്ട്‌ ബാങ്കാണ്‌.
ഖണ്‌ഡാമല്‍ ജില്ലയിലാണ്‌ വര്‍ഗീയസംഘര്‍ഷം ഏറ്റവും രൂക്ഷമായിരുന്നത്‌. മലയാളികളായ ചില വൈദികരും കന്യാസ്‌ത്രീകളും അവിടെ ഹിന്ദുമതഭ്രാന്തന്‍മാരുടെ ഇരകളാണെന്ന്‌ വിളിച്ചുപറഞ്ഞ്‌ കേരളത്തിലെ മതേതര നേതാക്കളും ചില പത്രങ്ങളും ക്രിസ്‌ത്യാനികളെ ഇളക്കിവിട്ടു.
അഭയയും അനൂപയും കന്യാസ്‌ത്രീ മഠങ്ങളുടെ ഇരകളായ കേരളത്തില്‍ അതിനെതിരെ ശബ്‌ദമുയര്‍ത്താത്തവര്‍ മെഴുകുതിരികളും കത്തിച്ച്‌ തെരുവിലിറങ്ങി. കേരളത്തില്‍ മാത്രമേ ഈ പ്രീണനം നടക്കൂ. കാരണം ഇവിടുത്തെ ഹിന്ദുഭൂരിപക്ഷം ഏറെയും കമ്യൂണിസ്റ്റ്‌, സോഷ്യലിസ്റ്റ്‌ മതങ്ങളില്‍ വിശ്വസിക്കുന്നവരാണല്ലോ!

ഒറീസയില്‍ ആളിപ്പടര്‍ന്ന കലാപത്തിന്റെ അടിവേരുകള്‍ സുവിശേഷവല്‍ക്കരണത്തിലാണെത്തുക. ഹിന്ദുമതത്തിലെ ചാതുര്‍വര്‍ണ്യമാണ്‌ ബഹുജനങ്ങളെ ക്രിസ്‌ത്യാനികളാക്കിയതെന്ന്‌ ചരിത്രപുസ്‌തകത്തില്‍ എഴുതിവച്ചവരൊക്കെ ഇതു കണ്ടില്ലെന്നു നടിച്ചു. നാഗാലാന്‍ഡിലും മിസോറാമിലും ആദിവാസി ഗോത്രങ്ങളെ ഒന്നടങ്കം മത പരിവര്‍ത്തനം നടത്തിയവര്‍ ആ ശ്രമം ഒറീസയിലും തുടരുകയാണ്‌. കേരളത്തില്‍ ഇതിന്‌ കാര്യമായ സ്‌കോപ്പില്ലെന്നു കണ്ടവര്‍ ഒറീസയിലേക്കു കുടിയേറി. കാരണം ക്രിസ്‌ത്യാനികളാക്കപ്പെടുന്നവരുടെ തലയെണ്ണിയാണ്‌ അവിടെ പണം കിട്ടുക.
അശരണര്‍ക്ക്‌ ശരണമാകുകയാണ്‌ തങ്ങളുടെ ലക്ഷ്യമെന്ന്‌ സുവിശേഷവല്‍ക്കരണത്തിന്റെ വക്താക്കളായ മിഷണറിമാര്‍ പറയുന്നു. ഉന്നതവിദ്യാഭ്യാസത്തിന്‌ യോഗ്യരായ പാവപ്പെട്ടവരെ തഴഞ്ഞ്‌ പണക്കാര്‍ക്കു വേണ്ടി മാത്രം പരസ്യമായി പ്രവര്‍ത്തിക്കുന്ന കേരളത്തിലെ മിഷണറിമാര്‍ ഇവരുടെ സഹോദരങ്ങളാണെന്നോര്‍ക്കണം. കേരളത്തിലെ പാവം പിന്നോക്കക്കാരനെ പ്രലോഭിപ്പിച്ച്‌ ക്രിസ്‌ത്യാനിയാക്കിമാറ്റി അവന്റെ സംവരണാനുകൂല്യം പോലും ഇല്ലാതാക്കിയ ഇവര്‍ക്ക്‌ ഇവിടെ ഇന്നും മാന്യതയുടെ വേഷമാണുള്ളത്‌.
കേരളത്തിലെ ആദിവാസി മേഖലകളില്‍ ഒരുകാലത്ത്‌ മതപരിവര്‍ത്തനം ശക്തമായിരുന്നു. അത്‌ അവിടെനിന്ന്‌ പിന്നോക്കക്കാരിലേക്കു കടന്നു. അങ്ങനെ പടിപടിയായി മുകളിലേക്കു കയറാനുള്ള ശ്രമത്തിനിടയില്‍ എസ്‌.എന്‍.ഡി.പി യോഗവും മറ്റ്‌ സാമുദായിക സംഘടനകളും കെട്ടുറപ്പോടെ ചെറുത്തു നിന്നതിനാല്‍ അവര്‍ക്കത്‌ ഉപേക്ഷിക്കേണ്ടിവന്നു. എന്നിട്ടും സ്വന്തംപേരിന്റെ ഭാഗമായി കൃഷ്‌ണനേയും ശിവനേയും മറ്റും വഹിച്ച്‌ പള്ളിയില്‍പോയി മുട്ടുകുത്തിമാത്രം പ്രാര്‍ത്ഥിക്കുന്ന വലിയൊരു സമൂഹം കേരള - തമിഴ്‌നാട്‌ അതിര്‍ത്തികളില്‍ ഇപ്പോഴുമുണ്ടെന്നോര്‍ക്കണം.
ഇസ്ലാമും ക്രൈസ്‌തവമതവും പരിവര്‍ത്തനത്തെ അനുകൂലിക്കുന്നവരാണ്‌. ഹിന്ദുമതത്തിന്റെ ചട്ടക്കൂടില്‍ അങ്ങനെയൊന്നില്ലതാനും. അതുകൊണ്ടാണ്‌ ഹിന്ദുമതത്തില്‍ നിന്നു മാത്രം മറ്റു മതങ്ങളിലേക്ക്‌ പരിവര്‍ത്തനം നടക്കുന്നത്‌. ഒറ്റപ്പെട്ട ഉദാഹരണങ്ങളല്ലാതെ ക്രിസ്‌തുമതം സ്വീകരിച്ച ഇസ്ലാമിനെ ആര്‍ക്കെങ്കിലും കാണിച്ചുതരാമോ? അതുപോലെ തിരിച്ചും.
ഇസ്‌ളാമിന്‌ ചെറുത്തു നില്‍ക്കാനുള്ള ശേഷിയുണ്ട്‌. ഹിന്ദുവിനതില്ല. ഹിന്ദു ചെറുത്തുനിന്നാല്‍ അത്‌ വര്‍ഗീയതയാകും. ആര്‍.എസ്‌.എസും, വി.എച്ച്‌.പിയും സ്വീകരിക്കുന്ന ചെറുത്തുനില്‍പിന്റെ രീതിയുടെ പ്രശ്‌നംകൂടിയാണിത്‌. ഇവിടെ ഈ സംഘടനകളെ എതിര്‍ക്കുന്നത്‌ മറ്റ്‌ വര്‍ഗീയ സംഘടനകളും രാഷ്‌ട്രീയകക്ഷികളും ഒറ്റക്കെട്ടായിട്ടാണ്‌. അതേസമയം മതപരിവര്‍ത്തനം നടത്തുന്ന ക്രിസ്‌ത്യന്‍ മിഷണറിമാര്‍ ഉള്‍പ്പെടെയുള്ളവരെ എതിര്‍ക്കാന്‍ ഹിന്ദു സംഘടനകള്‍ മാത്രമേയുള്ളു. രാഷ്‌ട്രീയക്കാര്‍ക്ക്‌ ഈ മിഷണറിമാര്‍ കണ്ണിലെ കൃഷ്‌ണമണിയാണ്‌. അതാണ്‌ ഇവരുടെ ധൈര്യവും.
നാഗാലാന്‍ഡിലും മിസോറാമിലുമൊന്നും ഇന്ന്‌ ആദിവാസി ഗോത്രങ്ങളില്ല. ആദിവാസി സമൂഹം ഹൈന്ദവമാണെന്നു വിശ്വസിക്കുന്നത്‌ പരമ്പരാഗതമായ സങ്കല്‍പമാണ്‌. കാരണം ഹൈന്ദവതയ്‌ക്ക്‌ ചട്ടക്കൂടില്ല. അത്‌ ഒരു സംസ്‌കാരമാണ്‌. തുറന്നുകിടക്കുന്ന അവിടേക്ക്‌ ആര്‍ക്കും എപ്പോള്‍ വേണമെങ്കിലും കടന്നുവരാം, ഇറങ്ങിപ്പോകാം. അതിനു ചട്ടക്കൂടുണ്ടാക്കിയത്‌ സാമുദായങ്ങളും അവരുടെ സംഘടനകളും ചില തീവ്രവാദസംഘടനകളും മാത്രമാണ്‌.
നമ്മുടെ ക്ഷേത്രങ്ങള്‍ പലതും ഈശ്വരദര്‍ശനത്തിനു നിബന്ധനകള്‍ വയ്‌ക്കുമ്പോള്‍ ആദിവാസിയുടെ ക്ഷേത്രത്തില്‍ വിലക്കുകളില്ല. അവിടെ മദ്യവും മാംസവും നിഷിദ്ധമല്ല, ഷര്‍ട്ടൂരേണ്ട, കുളിച്ചില്ലെങ്കിലും കുഴപ്പമില്ല, പള്ളികള്‍പോലെ! ആദിവാസികള്‍ക്ക്‌ ആവശ്യം ദൈവം നല്‍കുന്ന പണമാണ്‌. അതു വേണ്ടുവോളം നല്‍കാന്‍ ക്രൈസ്‌തവമതത്തിനു കഴിയുന്നുണ്ടെന്നതിനാല്‍ അവര്‍ ജ്ഞാനസ്‌നാനം ചെയ്യപ്പെടുന്നു. അല്ലാതെ വിദ്യാഭ്യാസവും മരുന്നും കിട്ടാനാണെങ്കില്‍ ക്രിസ്‌ത്യാനിയാകുന്നതെന്തിന്‌?
ഒറീസയിലെ കണക്കുകള്‍ നോക്കുക. ഖണ്‌ഡാമല്‍ ജില്ലയില്‍ മാത്രം 1991ലെ സെന്‍സസ്‌ പ്രകാരം ക്രൈസ്‌തവരുടെ എണ്ണം 75,597 ആയിരുന്നു. പത്തു വര്‍ഷം കഴിഞ്ഞപ്പോള്‍ ഇത്‌ 1,17,950 ആയി ഉയര്‍ന്നു. 1981ല്‍ ഒറീസയില്‍ ജനസംഖ്യയുടെ 1.7 ശതമാനമായിരുന്ന ക്രൈസ്‌തവര്‍ 2001ല്‍ 2.4 ശതമാനമായിട്ടാണ്‌ വര്‍ധിച്ചത്‌. ഇത്‌ വെറുമെരു വര്‍ധനവല്ല.
കേരളത്തിലെപോലെ ഇനി പെറ്റുകൂട്ടണമെന്ന്‌ അവിടുത്തെ ക്രിസ്‌ത്യാനിയോട്‌ ഒരു വികാരിയും ആഹ്വാനം ചെയ്‌തിരുന്നില്ല. പിന്നെയോ, മതപരിവര്‍ത്തനത്തിലൂടെ പിടിച്ചെടുത്തതാണ്‌ ഈ എണ്ണപ്പെരുപ്പം.

ഖണ്‌ഡാമലിലെ ജനസംഖ്യയുടെ 80 ശതമാനം വരുന്ന ദലിതര്‍ എല്ലാവരാലും അവഗണിക്കപ്പെട്ടുകിടക്കുകയായിരുന്നു. കൊടിയ ദാരിദ്ര്യത്തിനിടയില്‍ അവര്‍ക്കു കിട്ടിയ കച്ചിത്തുരുമ്പായിരുന്നു ക്രിസ്‌തുമതത്തിലേക്കുള്ള പരിവര്‍ത്തനം. ക്രൈസ്‌തവ മിഷണറിമാരുടെ പ്രവര്‍ത്തനങ്ങള്‍ക്ക്‌ ഉദ്ദേശ്യശുദ്ധിയുണ്ടായിരുന്നെങ്കില്‍ മതപരിവര്‍ത്തനം നടത്താതെ അവര്‍ സേവ ചെയ്യേണ്ടിയിരുന്നു. അതുണ്ടായില്ല.
ഒറീസയില്‍ മതപരിവര്‍ത്തനത്തിന്‌ ഏറെയും വിധേയരായത്‌ പാണ വിഭാഗത്തില്‍പെട്ടവരാണ്‌. സംവരണത്തിന്‌ അര്‍ഹരായ ഇവര്‍ക്ക്‌ പക്ഷേ, മതപരിവര്‍ത്തനം നടന്നുകഴിഞ്ഞാല്‍ ആനുകൂല്യം കിട്ടില്ല. അത്‌ മറച്ചുവച്ചായിരുന്നു തല്‍ക്കാല ലാഭത്തിനായി മിഷണറിമാര്‍ ഇവരെ പരിവര്‍ത്തനം നടത്തിയത്‌. ദളിതര്‍ക്കും അവരുടെ സംവരണത്തിനും വേണ്ടി ഘോരഘോരം പ്രസംഗിക്കുന്ന നമ്മുടെ രാഷ്‌ട്രീയക്കാര്‍ ഇതൊക്കെ കണ്ടില്ലെന്നു നടിക്കുകയാണ്‌. സംവരണനിഷേധത്തിലുള്ള അമര്‍ഷം ഈ വിഭാഗത്തിലെ അല്‍പമെങ്കിലും ചിന്താശേഷിയുള്ള യുവാക്കളെ പ്രകോപിതരാക്കിയിട്ടുണ്ട്‌.
ഇതിനിടയില്‍ വര്‍ഗീയകലാപത്തിന്റെ പേരില്‍ സഹതാപം നേടാനാണ്‌ ക്രൈസ്‌തവ സമൂഹം ശ്രമിക്കുന്നത്‌. നുവാപാഡയില്‍ ഹിന്ദുതീവ്രവാദികളുടെ ആക്രമണത്തില്‍ രജനി മാജി എന്ന ഹിന്ദുയുവതി കൊല്ലപ്പെട്ടിരുന്നു. പദംപൂര്‍ വനിതാകോളജ്‌ വിദ്യാര്‍ഥിനിയായിരുന്ന ഈ 22കാരി ഒരു അനാഥാലയത്തിലെ കുട്ടികളെ രക്ഷിക്കാന്‍ ശ്രമിക്കുമ്പോഴാണ്‌ അക്രമികളെറിഞ്ഞ തീപ്പന്തത്തിനിരയായത്‌. അവിടെയുണ്ടായിരുന്ന ഒരു വൈദികന്‍ മൂത്രപ്പുരയില്‍ കയറി രക്ഷപ്പെട്ടു. പക്ഷെ, പുറംലോകത്തു നടന്ന പ്രചരണം ഒരു ക്രൈസ്‌തവയുവതിയാണ്‌ കൊല്ലപ്പെട്ടതെന്നാണ്‌. അക്രമം മാത്രമറിയാവുന്ന ഹിന്ദു തീവ്രവാദികള്‍ക്കെതിരേ വികാരമുണ്ടാക്കാനുള്ള ഒരു തന്ത്രമായിരുന്നു ഇത്‌.
ലക്ഷ്‌മണാനന്ദയെ വധിച്ചതിന്റെ ഉത്തരവാദിത്തം ഏതാനും ദിവസം മുമ്പാണ്‌ മാവോയിസ്റ്റുകള്‍ ഏറ്റെടുത്തത്‌. മാവോയിസ്റ്റുകളും രാഷ്‌ട്രീയക്കാരും എന്തുകൊണ്ടാണ്‌ മതപരിവര്‍ത്തനത്തെ എതിര്‍ക്കാത്തതെന്ന്‌ ചിന്തിക്കുക.
വീണ്ടും ആക്രമിക്കാതിരിക്കാന്‍ തോന്നാത്തവണ്ണം ശക്തമായി തിരിച്ചടിക്കുന്ന രീതിയാണ്‌ ഹിന്ദുതീവ്രവാദികള്‍ പലപ്പോഴും സ്വീകരിക്കുന്നത്‌. അത്‌ അനവധി നിരപരാധികളെ കൊലക്കത്തിക്കിരയാക്കുകയും ചെയ്യും. ഒറീസയില്‍ ഇത്തവണ സംഭവിച്ചതും അതു തന്നെയാണ്‌. കലാപത്തിന്റെ വിഷവിത്ത്‌ വിതച്ചത്‌ ക്രിസ്‌ത്യന്‍ മിഷണറിമാരായിരുന്നു. അതില്‍ നിന്ന്‌ വളര്‍ന്ന വിഷഫലത്തിന്റെ ദുരന്തം, വിതച്ചവര്‍ക്കൊപ്പം നിരപരാധികളും അനുഭവിക്കേണ്ടിവന്നു. ഇപ്പോഴാകട്ടെ അതിന്റെ പേരില്‍ കേരളത്തിലുള്‍പ്പെടെ മുതലെടുപ്പു നടക്കുന്നു. ക്രൈസ്‌തവ മാനേജ്‌മെന്റുകളുടെ കീഴിലുള്ള വിദ്യാഭ്യാസ സ്ഥാപനങ്ങള്‍ അടച്ചിട്ടുവരെ പ്രതിഷേധം നടന്നു.
ഇസ്ലാം മതപരിവര്‍ത്തനം നടത്തിയിരുന്നത്‌ പലപ്പോഴും ഭീഷണിയുടെ സ്വരമുപയോഗിച്ചായിരുന്നു. പ്രലോഭിപ്പിക്കാന്‍ അവര്‍ക്കു കോപ്പില്ല, ക്രിസ്‌ത്യാനികളെ അപേക്ഷിച്ച്‌. അതേസമയം ക്രൈസ്‌തവസഭകള്‍ ഒരിക്കലും അക്രമത്തിന്റെ പാത സ്വീകരിച്ചിരുന്നില്ല. പണവും സുഖവും വാഗ്‌ദാനം ചെയ്‌ത്‌ പ്രലോഭനത്തിന്റെ വഴിയിലൂടെയാണ്‌ അവര്‍ മതപരിവര്‍ത്തനം നടത്തിയത്‌.
ലോകത്ത്‌ ഇന്ത്യയോളം മതസ്വാതന്ത്ര്യം നല്‍കുന്ന മറ്റൊരു രാജ്യമില്ല. ഇവിടം മതേതരമായതാണ്‌ അതിനു കാരണം. ഹിന്ദുക്കള്‍ അറബിരാജ്യങ്ങളിലോ, ക്രൈസ്‌തവരാജ്യങ്ങളിലോ പോയി ആരേയും മതപരിവര്‍ത്തനത്തിനു പ്രേരിപ്പിക്കുന്നില്ല. അങ്ങനെചെയ്‌താല്‍ അവര്‍ക്ക്‌ പിന്നീടൊരിക്കലും ജയിലഴികള്‍ക്കുള്ളില്‍ നിന്നു പുറത്തുവരാനാകില്ല. മാത്രമല്ല, അങ്ങിനെ പരിവര്‍ത്തനം ചെയ്‌തപ്പെടാവുന്നതല്ല ഹൈന്ദവസംസ്‌കാരം. സമീപകാലത്ത്‌ മാലിയില്‍ മതപരിവര്‍ത്തനത്തിനു ശ്രമിച്ച ഒരു മിഷണറിക്ക്‌ ജയിലിലാകേണ്ടിവന്നത്‌ വാര്‍ത്തയായിരുന്നു.
ഇന്ത്യയില്‍ ക്രൈസ്‌തവര്‍ ന്യൂനപക്ഷമാണെന്നാണ്‌ വാദം, അതുപോലെ ഇസ്ലാമും. പക്ഷേ ആഗോളവല്‍ക്കരണം വരികയും ലോകം ഒരു കുടക്കീഴിലാകുകയും ചെയ്യുമ്പോള്‍ യഥാര്‍ഥ ന്യൂനപക്ഷമായി മാറുന്നത്‌ ഹിന്ദു സമൂഹമാണ്‌. ലോകത്ത്‌ ക്രൈസ്‌തവരും ഇസ്ലാമും വന്‍ ഭൂരിപക്ഷമാണെന്നോര്‍ക്കുക. മറ്റൊരു രാജ്യത്തും മതന്യൂനപക്ഷങ്ങള്‍ക്കില്ലാത്ത പ്രവര്‍ത്തനസ്വാതന്ത്ര്യവും സാഹചര്യവും ആനുകൂല്യങ്ങളും ഇന്ത്യയിലുണ്ട്‌. അതു മുതലെടുത്ത്‌ കൂടുതലാളുകളെ തങ്ങളുടെ മതത്തിലേക്ക്‌ ആകര്‍ഷിക്കാനാണ്‌ യഥാര്‍ഥ വര്‍ഗീയവാദികള്‍ ശ്രമിക്കുന്നത്‌. ഇതിനോട്‌ പ്രതികരിക്കുന്നവരെ ഹിന്ദു തീവ്രവാദിയെന്നു മുദ്രകുത്തുക കൂടി ചെയ്യുമ്പോള്‍ കലാപം യാഥാര്‍ഥ്യമാകുന്നു. ഇന്ത്യയെ അതിഭീകരമായ ഒരു വര്‍ഗീയ സംഘര്‍ഷത്തിലേക്കായിരിക്കും ഇത്‌ നയിക്കുക.
മതപരിവര്‍ത്തനത്തെ മുളയിലേ നുള്ളാന്‍ ഇനിയാകില്ല. പക്ഷേ അതിന്റെ വളര്‍ച്ച തടയാനായാല്‍ ഹൈന്ദവതീവ്രവാദത്തിന്‌ ഇവിടെ ശക്തിപ്പെടാനാകില്ല. അതുകൊണ്ട്‌ ഒറീസയിലെ ന്യൂനപക്ഷപീഡനത്തെ എതിര്‍ക്കും മുമ്പ്‌ മതപരിവര്‍ത്തനത്തിനെതിരെ ഒരു ചെറുവിരലെങ്കിലും അനക്കാന്‍ നാം തയ്യാറാകേണ്ട സമയം അതിക്രമിച്ചിരിക്കുന്നു.

(കറന്റ്‌ അഫയേഴ്‌സ്‌ മാസിക ഫെബ്രുവരി 2009)

31 comments:

  1. ഒറിസ്സ കലാപത്തിന്റെ മറുപുറം കാണുക....

    ReplyDelete
  2. After having read the entire post I still did not understand how conversion caused all of this.

    Like you said Hinduism was a very open culture and thats the only reason why I am a Christian right now. My fore fathers might have been some Adivasis or some lower class caste people. They were converted and educated and helped by missionaries.

    Who else cared to look into those villages ? Who else would go there are build schools, build hospitals and teach them. I am very harsh critic of the Christian leadership and their activities. But there are somethings that they do which needs to be appreciated.

    Why is there, not even a small mention of the political overtones of the sudden feelings against the Christians ? Do you think the NSS and the SNDP (so called protectors of hinduism) did it just to protect hinduism ? Dont they have any political reasons, especially the SNDP.

    Its all divide and rule. You cannot blame the Christians, you cannot blame the hindus. When political interests come between religions worse is bend to happen.

    Like your last sentence, before taking the sword against missionaries lets raise atleast our little finger to help those adivasis and downtrodden people. After they are in a same social status as us, lets come and fight.

    ReplyDelete
  3. സുഹൃത്തേ,

    താങ്കള്‍ പറഞ്ഞ ചില കാര്യങ്ങളോട്‌ യോജിക്കുന്നുവെങ്കിലും പലതിനോടും വിയോജിപ്പാണ്‌. ഓരോന്നും എടുത്തു പറയാന്‍ താല്‍പര്യം തോന്നുന്നില്ല. അതിനായി ആള്‌ ക്യൂവിലുണ്ട്‌.
    കേരളത്തിലെ ഒരു തലമൂത്ത നേതാവിന്റെ മരുമകന്‍ ഡോക്ടറുടെ കയ്യില്‍ ഒരിക്കല്‍ ഒരു നവരത്നമോതിരം കണ്ടു. സായിബാബ അന്തരീക്ഷത്തില്‍ നിന്നും സൃഷ്ടിച്ചു കൊടുത്തതാണത്രെ. പക്ഷെ സായി ബാബയെ കാണാന്‍ ചെല്ലുന്ന സാധാരണക്കാര്‍ക്കാര്‍ക്കും അദ്ദേഹം ഇത്തരം ഒരു സമ്മാനം നല്‍കിയതായി കേട്ടിട്ടില്ല. എല്ലാവര്‍ക്കും ഓരോന്ന് ചുമ്മാതെ അന്തരീക്ഷത്തില്‍ നിന്നും എടുത്തു കൊടുത്താല്‍ പോരെ, നിസ്സാരം. പറഞ്ഞത്‌ സായിബാബയുടെ വിദ്യകളെപ്പറ്റിയല്ല, മറിച്ച്‌ ഹൈന്ദവാചാര്യന്മാര്‍ എല്ലാവരേയും ഒരു പോലെ കണ്ട്‌ സേവിക്കുന്നു എന്നു താങ്കള്‍ പറഞ്ഞപ്പോള്‍ വെറുതേ ഓര്‍ത്തുപോയതാണ്‌.

    ReplyDelete
  4. "ക്രൈസ്‌തവ മിഷണറിമാരുടെ പ്രവര്‍ത്തനങ്ങള്‍ക്ക്‌ ഉദ്ദേശ്യശുദ്ധിയുണ്ടായിരുന്നെങ്കില്‍ മതപരിവര്‍ത്തനം നടത്താതെ അവര്‍ സേവ ചെയ്യേണ്ടിയിരുന്നു."
    True.

    ReplyDelete
  5. മതസ്വാതന്ത്ര്യം എന്നത് അമിതസ്വാതന്ത്യ്രം എന്നാണ് ന്യൂനപക്ഷങ്ങള്‍ എന്ന് അവകാസപ്പെടുന്ന സമൂഹങ്ങള്‍ മനസ്സിലാക്കിയിരിക്കുന്നത്. അത്തരം ന്യൂനപക്ഷമാണ് ഇപ്പോള്‍ ഭൂരിപക്ഷത്തെ ഭരിക്കാന്‍ ശ്രമിക്കുന്നത്. അതും ഇന്ത്യയിലേ നടക്കൂ...

    നന്മ ചെയ്യുന്നു എന്ന് പുറംലോകത്തിനു തോന്നുന്ന വിധം മതപരിവര്‍ത്തനം ആണ് അവരുടെ ലക്ഷ്യം.

    ശരി, ഹിന്ദുക്കള്‍ മറ്റു ഹിന്ദുക്കളെ സഹായിക്കുന്നില്ല. അതിന് അവരെ പ്രലോഭിപ്പിച്ചു മതം മാറ്റാന്‍ ഈ ന്യൂനതയുള്ള പക്ഷങ്ങള്‍ ആരാ? ആദ്യം അവനവന്‍റെ ന്യൂനത മാറ്റട്ടെ... എന്നിട്ടുമതി മറ്റുള്ളവരെ കൂടി ചേര്‍ത്തു ഭൂരിപക്ഷമാവാന്‍...

    ReplyDelete
  6. ഞാൻ യോജിക്കുന്നു.

    ReplyDelete
  7. " മറ്റൊരു രാജ്യത്തും മതന്യൂനപക്ഷങ്ങള്‍ക്കില്ലാത്ത പ്രവര്‍ത്തനസ്വാതന്ത്ര്യവും സാഹചര്യവും ആനുകൂല്യങ്ങളും ഇന്ത്യയിലുണ്ട്‌. അതു മുതലെടുത്ത്‌ കൂടുതലാളുകളെ തങ്ങളുടെ മതത്തിലേക്ക്‌ ആകര്‍ഷിക്കാനാണ്‌ യഥാര്‍ഥ വര്‍ഗീയവാദികള്‍ ശ്രമിക്കുന്നത്‌. "

    100% യാഥാർത്ഥ്യം.

    ReplyDelete
  8. കമന്റുകള്‍ ഒന്നു കണ്ടോട്ടെ, ഒരു കുഞ്ഞു കനാല്‍ എന്റെ മെയിലിലേക്ക് തുറന്ന് വച്ചിരിക്കുന്നു:)

    ReplyDelete
  9. ഇതിനൊരു പോംവഴി നിര്‍ബന്ധിത മത പരിവര്‍ത്തനം നിയമം മൂലം നിരോധിക്കുക എന്നുള്ളതാണ്.
    വെള്ളായണി വിജയന്‍

    ReplyDelete
  10. "ഹൈന്ദവതയ്‌ക്ക്‌ ചട്ടക്കൂടില്ല. അത്‌ ഒരു സംസ്‌കാരമാണ്‌. തുറന്നുകിടക്കുന്ന അവിടേക്ക്‌ ആര്‍ക്കും എപ്പോള്‍ വേണമെങ്കിലും കടന്നുവരാം, ഇറങ്ങിപ്പോകാം".
    എന്ന് താങ്കള്‍ തന്നെ പറയുന്നു, പിന്നെയെങ്ങിനെ പത പരിവര്‍ത്തനം ചെറുക്കാന്‍ ചെറുവിരലെങ്കിലും അനക്കാതിരിക്കുന്നതിനെത്രെയുള്ല താങ്കളുടെ രോഷം ഉള്‍ക്കൊള്ളും? ഇപ്പോള്‍ തകര്‍ത്ത ഗ്രാമം പുതുക്കിപ്പണിയാമെന്ന് ഹിന്ദ്യ് സംഘടനകള്‍ പറയുന്നു, എങ്കിലീ പണം മുമ്പേ പാവങ്ങളുടെ പട്ടിണി ഒഴിവാക്കാന്‍ ഉപയോഗിക്കാമായിരുന്നു, എങ്കിലവര്‍ ഹിന്ദു മതം വിട്ട് വേറെ ഒരു മതത്തിലേക്ക് പോകില്ലായിരുന്നു, ഭക്ഷണം കഴിഞ്ഞേ മതമുള്ളൂ... ആശംസകള്‍.

    ReplyDelete
  11. "ഇതിനൊരു പോംവഴി നിര്‍ബന്ധിത മത പരിവര്‍ത്തനം നിയമം മൂലം നിരോധിക്കുക എന്നുള്ളതാണ്."

    There is no such thing as forced conversion. How Can you use force to change your believes ?

    Forcing someone to do anything against his will is already a crime.

    ReplyDelete
  12. അല്ലാ നിയാസേ, മതപരിവര്‍ത്തനമല്ലേ ഇവിടെ പോസ്റ്റിലെ പ്രധാന വിഷയം. അതിനെ എതിര്‍ത്തോ അനുകൂലിച്ചോ ഒന്നും പറഞ്ഞില്ലല്ലോ.ചര്‍ച്ച വഴി തെറ്റിയോ എന്ന് സംശയം.

    വെള്ളായണി വിജയന്‍ മാഷിന്റെ കമന്റിനോട് എനിക്കും യോജിപ്പില്ല. എന്തിനു നിര്‍ബന്ധിത പരിവര്‍ത്തനമെന്നല്ല, പരിവര്‍ത്തനം തന്നെ എന്തിനു? സന്മനസ്സുണ്ടെങ്കില്‍ അങ്ങ് സഹായിച്ചാല്‍ പോരെ?

    ReplyDelete
  13. ദയവായി ഈ മൈനയുടെ ഈ പോസ്‌റ്റുകൂടി കാണുക... എന്നിട്ടു നമുക്ക്‌ ചര്‍ച്ച തുടരാം.
    www.sarpagandhi.blogspot.com

    ReplyDelete
  14. അസമത്വം നിലനിര്‍ത്തണമെന്നു നിയമമുണ്ടാക്കിയ രാജ്യത്ത്(വര്‍ണ്ണ വ്യവസ്ഥിതിയില്‍)ജീര്‍ണ്ണതയല്ലാതെ മറ്റൊന്നും നമുക്കു വഴികളില്ല. സ്വാതന്ത്ര്യം ലഭിച്ച് അര നൂറ്റാണ്ടു കഴിഞ്ഞിട്ടും വിപ്ലവ പ്രസ്ഥാനങ്ങളുടെ അടക്കം മണ്ടയില്‍ ബ്രാഹ്മണ്യത്തിന്റെ വിഴുപ്പു ചുമക്കുന്നവരുടെ നേതൃത്വമായ മണ്ടരി ബാധയാണ്.
    കൃസ്ത്യാനികളായെങ്കിലും മനുഷ്യന്‍ ബ്രാഹ്മണ ഹിന്ദു മതത്തിന്റെ ചെകുത്താനില്‍ നിന്നും രക്ഷപ്പെടട്ടെ എന്നാണു തോന്നുന്നത്.
    ഒന്നുമില്ലെങ്കിലും നിലവിളിക്കാനെങ്കിലുമുള്ള സ്വാതന്ത്ര്യം കൃസ്തുമതത്തിലൂടെ ആദിവാസികള്‍ക്കും ദളിതര്‍ക്കും ലഭിക്കും.
    സന്യാസിമാരുടെ കപട വേഷത്തില്‍ ആദിവാസികള്‍ക്കിടയില്‍ കൃസ്തുമത പരിവര്‍ത്തനം നടത്തുന്ന കൂലി പുരോഹിതന്മാര്‍ക്ക് തലയെണ്ണി പണം ലഭിക്കുന്നത് ന്യായീകരിക്കുകയല്ല. എന്നാല്‍ , ഹിന്ദു-മുസ്ലീം എന്നീ നികൃഷ്ട മതങ്ങളില്‍ വിശ്വസിച്ച് നശിക്കുന്നതിനേക്കാള്‍ നല്ലത് , കൃസ്ത്യന്‍ കുഞ്ഞാടായിരിക്കുന്നതുതന്നെ !

    ReplyDelete
  15. This comment has been removed by the author.

    ReplyDelete
  16. അല്ല ഈ മത പരിവര്‍ത്തനം ഏതാണ്ട് വലിയ അപരാധമാണെന്നമട്ടിലാണല്ലോ.. മനുഷ്യന്റെ മൌലികമായ അവകാശമാണു സുഹൃത്തുക്കളേ ഈ മത പരിവരത്തനം, അത് കാശു വാങ്ങിയിട്ടായാലും അല്ലാതെയായാലും. അതിനെതിരെ അസഹിഷ്ണുക്കളായിട്ടു കാര്യമില്ല.

    പാവപ്പെട്ടവന്‍ കാശു വാങ്ങിയോ അല്ലാതെയോ ഇഷ്ടം പോലെ മത പരിവര്‍ത്തനം നടത്തട്ടെ.. ആര്‍ക്കെങ്കിലും അസഹിഷ്ണുത അനുഭവപ്പെടുന്നെങ്കില്‍ വല്ല മനശ്ശാസ്ത്രജ്ഞനേയും കാണുക.

    ReplyDelete
  17. "ക്രൈസ്‌തവ മിഷണറിമാരുടെ പ്രവര്‍ത്തനങ്ങള്‍ക്ക്‌ ഉദ്ദേശ്യശുദ്ധിയുണ്ടായിരുന്നെങ്കില്‍ മതപരിവര്‍ത്തനം നടത്താതെ അവര്‍ സേവ ചെയ്യേണ്ടിയിരുന്നു."

    ReplyDelete
  18. "ക്രൈസ്‌തവ മിഷണറിമാരുടെ പ്രവര്‍ത്തനങ്ങള്‍ക്ക്‌ ഉദ്ദേശ്യശുദ്ധിയുണ്ടായിരുന്നെങ്കില്‍ മതപരിവര്‍ത്തനം നടത്താതെ അവര്‍ സേവ ചെയ്യേണ്ടിയിരുന്നു."

    ക്രൈസ്തവമിഷനറിമാര്‍ക്ക് ഉദ്ദേശശുദ്ധിയില്ലായിരിക്കാം, എന്നുവച്ച്? അവരെയങ്ങു ചുട്ടുകൊല്ലാമെന്നോ? നിയമവിരുദ്ധമായി അവരൊന്നും ചെയ്യുന്നില്ലല്ലോ?ഉദ്ദേശശുദ്ധിയില്ലാത്തവരെയൊക്കെ കത്തിക്കാനാണെങ്കില്‍ ഇന്ത്യയില്‍ വിറക് തികയില്ല!

    നിര്‍ബന്ധിതമതപരിവര്‍ത്തനമോ? അതെപ്പോ നടന്നു? ഓര്‍മ്മ ശരിയാണെങ്കില്‍ ഔറംഗസേബ് ആയിരത്തീഎഴുന്നൂറ്റിനാലില്‍ മരിച്ചു!

    “മറ്റൊരു രാജ്യത്തും മതന്യൂനപക്ഷങ്ങള്‍ക്കില്ലാത്ത പ്രവര്‍ത്തനസ്വാതന്ത്ര്യവും സാഹചര്യവും ആനുകൂല്യങ്ങളും ഇന്ത്യയിലുണ്ട്‌“

    ഉവ്വ! ധൈര്യമുണ്ടെങ്കില്‍ കര്‍ണ്ണാടകയിലെ (ഉത്തരേന്ത്യയിലെയും) സകല സര്‍ക്കാരോഫീസുകളിലും കാണുന്ന (നിയമവുരുദ്ധമായ) പൂജാമുറികളില്‍ ഒരു കുരിശുനാട്ടി പ്രാര്‍ത്ഥിക്ക്...

    ReplyDelete
  19. നിര്‍ബന്ധിതമതപരിവര്‍ത്തനം !
    അതു ചെയ്തിട്ടുള്ളത് സംഘ പരിവാരങ്ങള്‍ മാത്രമല്ലേ..
    http://www.hindu.com/2008/10/13/stories/2008101356471200.htm

    ഒരു ജനാധിപത്യ സംസ്ഥാനത്ത് ഭരണം നടത്തുന്നത് തീവ്രവാദികള്‍. വോട്ട് ചെയ്തവര്‍ മണ്ടന്മാര്‍!

    ReplyDelete
  20. നിര്‍ബന്ധിത മതപരിവര്‍ത്തനം നടക്കുന്നില്ല. പ്രലോഭിത മതപരിവര്‍ത്തനമാണ് നടക്കുന്നത്.

    വിദേശപണം നിര്‍ല്ലോഭം വാരിയെറിഞ്ഞുകൊണ്ടാണിത് നടത്തുന്നത്. കേരളത്തില്‍ പെന്തക്കോസ്തില്‍ ചേരുന്നയാള്‍ക്ക് 5000 മുതല്‍ 10000 വരെയാണ് റേറ്റ്. കുടുംബമായിട്ടാണെങ്കില്‍ അത് 25-30 വരെയൊക്കെയാകും. പാസ്റ്ററായി പ്രവര്‍ത്തിക്കാമെങ്കില്‍ മാസം 5000 രൂപ കിട്ടും. പുതുതായി കൊണ്ടുവരുന്നവരുടെ തലയെണ്ണി കമ്മീഷനും.

    പുതിയ മതത്തില്‍ ചേര്‍ന്നുകഴിയുന്നതോടെ മെല്ലെ മെല്ലെ സഹായമൊക്കെ നിലയ്ക്കും. ഉദ്ദേശം സാധിച്ചില്ലേ ഇനി കാ‍ശുകൊടുത്തിട്ടെന്താ കാര്യം. അവര്‍ പണസഞ്ചിയുമായി പുതിയ ഇരകളെത്തേടി യാത്രയാകും.

    ഇങ്ങനെ വെട്ടിലായ നിരവധിയാളുകളുണ്ട്. തമിഴ്‌നാട്ടില്‍ ഈ ചതിയില്‍ പ്രതിക്ഷേധിച്ച് ആയിരക്കണക്കിനാളുകള്‍ തിരികെ തങ്ങളുടെ പൂര്‍വ്വമതത്തില്‍ ചേര്‍ന്നത് ഓര്‍മ്മിക്കുമല്ലോ.

    പ്രലോഭിപ്പിച്ച് എണ്ണം കൂട്ടുന്ന ഈ വിദ്യ വിദേശപണത്തിന് മാര്‍ഗ്ഗമില്ലാത്ത മറ്റു മതങ്ങള്‍ക്ക് സാധിക്കില്ല. അവര്‍ അക്രമത്തിലേക്ക് തിരിയുന്നതിന്റെ കാരണവുമിതാകാം. എണ്ണം കൂട്ടുന്നതിന്റെ പിന്നിലെ രാഷ്ട്രീയ ലക്ഷ്യങ്ങളും മനസിലാക്കേണ്ടതുണ്ട്. ഉദാഹരണം ആസാം.

    ഇന്തയിലെ മിക്ക ക്രൈസ്തവ സഭകളുടെയും ആസ്ഥാനമാ‍യ തിരുവല്ലയില്‍ ഇതുമായി ബന്ധപ്പെട്ട കഥകള്‍ക്കൊരു ക്ഷാമവുമില്ല.

    ReplyDelete
  21. 5000 അല്ല ചിലപ്പോള്‍ വെറും 100 രൂപയ്ക്ക് വേണ്ടി മതം മാറിയെന്നു വരും..അല്ലെങ്കില്‍ ഒരു നേരത്തെ ഭക്ഷണത്തിനു വേണ്ടി..അതു പറ്റില്ലെന്നു പറയാന്‍ ഒരുത്തനും അവകാശമില്ല.
    സര്‍ക്കാരു പോലും പലിശയില്ലാതെ കടം കൊടുക്കുന്ന കാലമല്ല, പിന്നെ മിഷണറിമാര്‍ക്ക് മതപരിവര്‍ത്തനം ചെയ്യാനുള്ള അവകാശവമുണ്ട്. അങ്ങിനെ തന്നെ വേണം താനും.

    ഇതു ജനാധിപത്യ രാജ്യമാണു, പഴയ ഫ്യൂടല്‍ സംവിധാനമൊക്കെ കാലം ചെന്നെന്നു മനസ്സില്ലാക്കാത്തവര്‍ പിച്ചും പേയും പറയും.

    ReplyDelete
  22. എല്ലാവരും പ്രസ്തുത മതത്തിലേക്ക് മാറിക്കഴിഞ്ഞാല്‍ ഭാരതം സ്വര്‍ഗ്ഗരാജ്യമാകുമെങ്കില്‍ നല്ലതുതന്നെ. എന്നാല്‍ യാഥാര്‍ഥ്യം അതില്‍ നിന്നും വളരെയകലെയാണ്. 90%ല്‍ അധികമാളുകള്‍ മതപരിവര്‍ത്തനത്തിന് വിധേയരായ നാഗാലാന്റിലെ സ്ഥിതി ഇപ്പോഴും പരമദയനീയമല്ലേ. ഭൂരിപക്ഷവും അധികാരവും മിഷനറികള്‍ക്ക് കിട്ടിയപ്പോള്‍ കാരുണ്യപ്രവര്‍ത്തനങ്ങള്‍ നിലച്ചു. തീവ്രവാദം വര്‍ദ്ധിക്കുകയും ചെയ്തു.

    ലോകത്തിലേറ്റവും കൂടുതല്‍ ദരിദ്രരുള്ള ആഫ്രിക്കന്‍ രാജ്യങ്ങളിലേക്ക് നോക്കൂ അവിടെ ക്രിസ്തുമതമല്ലേ ബഹുഭൂരിപക്ഷം. അവിടെയെന്താ കാരുണ്യപ്രവര്‍ത്തനങ്ങള്‍ (?) ഇവിടത്തെപ്പോലെ നടക്കുന്നതായി നാമറിയാത്തത്. അവിടെ എണ്ണം കൂട്ടലിന് സ്കോപ്പില്ലെന്നതുതന്നെ കാരണം.

    മലപ്പൂറത്ത് അതിദയനീയസ്ഥിതിയുള്ള മുസ്ലിം കുടുംബങ്ങളുടെല്ലോ അവരെയൊന്നും സഹായിക്കേണ്ടേ? ഉവ്വാ..അവിടെ പരിവര്‍ത്തനത്തിന് ചെന്നാല്‍ വിവരമറിയും !

    അഫ്ഗാനിസ്ഥാന്‍, ഇറാക്ക്, ഇറാന്‍ അങ്ങനെ കിടക്കുകയല്ലേ അതിദരിദ്രരുടെ രാജ്യങ്ങള്‍ അവിടെയൊക്കെയാണ് യഥാര്‍ഥ മിഷനറി പ്രവര്‍ത്തനങ്ങള്‍ നടത്തേണ്ടത് :)

    ReplyDelete
  23. ചില കമന്റുകള്‍ ഒക്കെ കണ്ടാല്‍ ചിരിക്കാതെന്ത് ചെയ്യും?
    ഒരു കുടുംബം പെന്തക്കോസ്തിലേക്ക് മാറുന്നെങ്കില്‍ 25000 രൂപയോ?
    എവിടാ അനൂപേ ഇത്രയും സാമ്പത്തികമുള്ള പെന്തക്കോസ്ത് സഭ?
    ചില പെന്തക്കോസ്തുകാര്‍ അടുത്ത സുഹൃത്തുക്കളായി ഉള്ളതുകൊണ്ട് ഇതിന്റെ സത്യാവസ്ഥ അറിയാന്‍ പറ്റി അല്ലെങ്കില്‍ ഞാനും വിശ്വസിച്ചുപോയേനേ:(
    പിന്നെ പാസ്റ്ററാ‍യി പ്രവര്‍ത്തിച്ചാല്‍ 5000 രൂപ, അത് വാസ്തവം
    അംഗീകരിക്കപ്പെട്ട സഭയുടെ പാസ്റ്ററായാല്‍ (ഫുള്‍ ടൈം)ചെലപ്പൊ അതില്‍ അധികവും കിട്ടും പക്ഷേ അവര്‍ ഇരിക്കുന്ന സഭ അത്രയും വലുതായിരിക്കണം. അല്ലെങ്കില്‍ വീട്ടില്‍ അടുപ്പ് പുകയില്ല:(
    പാസ്റ്ററാവുന്ന ആര്‍ക്കും അയ്യായിരം വച്ച് കിട്ടിയിരുന്നെങ്കില്‍ പാസ്റ്ററാവാന്‍ കേരളത്തില്‍ ജനം പോരാതെ വന്നേനേ അനൂപേ, ഒരു കാര്യം ആരോപിക്കുമ്പോള്‍ അതിലെത്രമാത്രം വാസ്തവമുണ്ടെന്ന് ഒന്നന്വേഷിക്കുന്നത് നല്ലതായിരിക്കും
    സുഹൃത്തിന്റെ വാക്കുകളില്‍ നിന്ന്:
    അതെ ചില പാസ്റ്റേഴ്സിനുപതിനായിരം ഒക്കെ കിട്ടുന്നുണ്ട്, കാരണം കേരളത്തിലെ സഭകളില്‍ അവര്‍ ശുശ്രൂഷിക്കുന്ന സഭകള്‍ തന്നെയാണ് അവര്‍ക്ക് ശമ്പളം കൊടുക്കുന്നത്,
    മാസംതോറുമുള്ള ശമ്പളം കൂടാതെ ഏതെങ്കിലും സ്പെഷ്യല്‍ പ്രാര്‍ത്ഥനയുണ്ടെങ്കില്‍ വീട്ടുകാരും എന്തെങ്കിലും കൊടുക്കും, അത് ചെലപ്പോള്‍ നൂറോ ഇരുന്നൂറോ ഒക്കെയാവാം, നല്ല സാമ്പത്തിക ശേഷിയുള്ള സഭകളാണെങ്കില്‍ നൂറ് പേരെങ്കിലും അംഗങ്ങളായിട്ടുണ്ടെങ്കില്‍ അത്രയും ഒക്കെ കിട്ടും, എന്നാല്‍ പത്ത് പേര്‍ അംഗങ്ങളായിട്ടുള്ള സഭകളും ഉണ്ട്, അവിടെ ശുശ്രൂഷിക്കുന്നവര്‍ക്ക് മിക്കവാറും പട്ടിണിയാവും ശമ്പളം.സ്വന്തം വീട്ടില്‍ അടുപ്പ് പുകയാന്‍ പണമില്ലാത്തവരാ പുതിയ ആളുകള്‍ക്ക് 25000 രൂ കൊടുത്ത് സഭ മാറാന്‍ പ്രേരിപ്പിക്കുന്നത്:(
    എന്നാല്‍ !സാധാരണ ഗതിയില്‍ പുതിയ പാസ്റ്റേഴ്സ് ആയിരിക്കും അത്തരം പുതിയ ചര്‍ച്ചുകളില്‍ മിനിസ്ട്രി ചെയ്യുന്നത്, സാധാരണ ഗതിയില്‍ അഞ്ചു വര്‍ഷം കൊണ്ട് ആ സഭ വളരും പത്തമ്പത് അംഗങ്ങളായാല്‍ സ്വയം പര്യാപ്തതയാവും, പിന്നെ ജീവിച്ചുപോകാന്‍ ബുദ്ധിമുട്ടുണ്ടാവില്ല,എന്നാല്‍ നല്ലതുപോലെ പ്രസംഗിക്കാന്‍ കഴിവുള്ളവരും, സഭയുടെ ഏറ്റവും നേതൃസ്ഥാനത്തിരിക്കുന്നവര്‍ക്കും നല്ല വരുമാനമുണ്ട്, ചിലര്‍ കോടികള്‍ ഉണ്ടാക്കിയിട്ടുണ്ട്, അത് എല്ലാവരും പറയുന്നത് പോലെ സായ്പ്പന്മാര്‍ കൊടുക്കുന്നതൊന്നും അല്ല, സഭയിലെ ഒരു വലിയ കൂട്ടം വിശ്വാസികള്‍ അമേരിക്കയിലും, ഇംഗ്ലണ്ടിലും ഗള്‍ഫ് രാജ്യങ്ങളിലും ഉണ്ട്, നല്ല കഴിവുള്ളവര്‍ മീറ്റിങ്ങുകള്‍ക്കും , കണ്‍‌വെന്‍ഷനുകള്‍ക്കും ഒക്കെ ആയി വിദേശത്ത് പോകും അവിടെ നിന്ന് ലക്ഷക്കണക്കിനു സമ്പാദ്യവും ആയിട്ടാണ് തിരിച്ചുവരുന്നത്,പക്ഷേ അത്തരം ക്രീം ലേയര്‍ കഷ്ടിച്ച് ഒരു നൂറ് പേരേ കാണൂ മൊത്തം പെന്തക്കോസ്ത് സഭകളില്‍.അവരൊന്നും സഭാ ശുശ്രൂഷയുള്ള പാസ്റ്ററന്മാരേയല്ല.സഭ വളര്‍ത്തുന്നത് അവരുടെ ഉത്തരവാദിത്വമല്ലെന്ന് ചുരുക്കം. കൂടാതെ അവരൊന്നും നയാ പൈസ ആര്‍ക്കും കൊടുത്ത് സഹായിക്കില്ല, മറ്റേത് സമൂഹം പോലെയാണ് പെന്തക്കോസ്ത്കാരും)

    ഇനി, ഓറീസയിലെ നിര്‍ബന്ധിതമോ പ്രലോഭനമോ ആയ മതപരിവര്‍ത്തനത്തെ കുറിച്ച് കേട്ടത് അവിടെ സ്കൂള്‍ നടത്തുന്ന ഒരു സിസ്റ്റെര്‍ പറഞ്ഞത്, അവരുടെ സ്കൂളിന്റെ വാന്‍ ഓടിക്കുന്നത് ഒരു ഹിന്ദുവാണ് കഴിഞ്ഞ 13 വര്‍ഷമായി അയാള്‍ തന്നെയാണ് ഡ്രൈവറായി ജോലിചെയ്യുന്നത് എന്ന്.
    ഇനിയും എനിക്ക് മറ്റൊരു അയല്‍‌വാസിയുണ്ട് ഒരു ആര്‍ എസ് എസ് പ്രവര്‍ത്തകന്‍, അമേരിക്കയില്‍ നിന്ന് വന്ന ഒരു പാസ്റ്ററുടെ സ്കോര്‍പിയോ അവനാണ് ഓടിക്കുന്നത് അയാള്‍ വര്‍ഷത്തില്‍ ഒരിക്കല്‍ അമേരിക്കയില്‍ നിന്നു വരും ഇവനെ എവിടെ നിന്നെങ്കിലും തപ്പിപിടിക്കും,ഒന്ന്/ഒന്നരമാസം അവനു കുശാല്‍ (അവന്‍ നേരിട്ട് പറഞ്ഞത്) പോകുമ്പോള്‍ നല്ല ശമ്പളവും കൊടുത്തിട്ട് പോകും.
    അങ്ങനെ എത്രയെത്ര, ഉദാഹരണങ്ങള്‍ ചൂണ്ടിക്കാണിക്കാം:)
    ഇതില്‍ കമന്റു ചെയ്ത മിക്ക ആളുകളും ക്രിസ്ത്യാനികളുടെ മോഡസ് ഓപെരാണ്ടിയെകുറിച്ച് വല്യ പിടിയില്ലാതെയാണ് എഴുതിയിട്ടുള്ളത്. വക്രബുദ്ധി സഹിതം ഏതോ കെട്ടുകേള്‍വികളാണ് മിക്കാ‍ാളുകളുടെയും കമന്റിനാധാരം, ചര്‍ച്ച കൊഴുക്കട്ടെ കൂടുതല്‍ തെളിവുകളും ആയി വരാം:)

    ReplyDelete
  24. "എല്ലാവരും പ്രസ്തുത മതത്തിലേക്ക് മാറിക്കഴിഞ്ഞാല്‍ ഭാരതം സ്വര്‍ഗ്ഗരാജ്യമാകുമെങ്കില്‍ നല്ലതുതന്നെ. എന്നാല്‍ യാഥാര്‍ഥ്യം അതില്‍ നിന്നും വളരെയകലെയാണ്. 90%ല്‍ അധികമാളുകള്‍ മതപരിവര്‍ത്തനത്തിന് വിധേയരായ നാഗാലാന്റിലെ സ്ഥിതി ഇപ്പോഴും പരമദയനീയമല്ലേ. ഭൂരിപക്ഷവും അധികാരവും മിഷനറികള്‍ക്ക് കിട്ടിയപ്പോള്‍ കാരുണ്യപ്രവര്‍ത്തനങ്ങള്‍ നിലച്ചു. തീവ്രവാദം വര്‍ദ്ധിക്കുകയും ചെയ്തു."

    ഈ തീവ്രവാദം വര്‍ദ്ധിച്ചത് കാരുണ്യപ്രവര്‍ത്തനങ്ങള്‍ നിലച്ചതുകൊണ്ടാണെന്നാണോ ? എങ്കില്‍ കാരുണ്യപ്രവര്‍ത്തനം തുടങ്ങുന്നതിനുമുന്‍പും തീവ്രവാദികളാകേണ്ടതല്ലേ. തീവ്രവാദികളുണ്ടാകുന്നതിനെപ്പറ്റിയുള്ള പുതിയ തിയറി കേള്‍ക്കാന്‍ താല്പര്യമുണ്ട്. ഇവിടെത്തന്നെയോ വേറെ പോസ്റ്റായ്
    --------------------

    “ലോകത്തിലേറ്റവും കൂടുതല്‍ ദരിദ്രരുള്ള ആഫ്രിക്കന്‍ രാജ്യങ്ങളിലേക്ക് നോക്കൂ അവിടെ ക്രിസ്തുമതമല്ലേ ബഹുഭൂരിപക്ഷം. അവിടെയെന്താ കാരുണ്യപ്രവര്‍ത്തനങ്ങള്‍ (?) ഇവിടത്തെപ്പോലെ നടക്കുന്നതായി നാമറിയാത്തത്. അവിടെ എണ്ണം കൂട്ടലിന് സ്കോപ്പില്ലെന്നതുതന്നെ കാരണം.“

    എണ്ണം കൂട്ടിക്കോട്ടെ അനൂപേ.. അതിനിത്ര ബേജാറാവുന്നതെന്തിനു. ജനാധിപത്യ വിരുദ്ധമായി പ്രവര്‍ത്തിക്കുന്നുണ്ടെങ്കില്‍ വ്യാകുലപ്പെട്ടാല്‍ പോരെ
    -------------------------

    മലപ്പൂറത്ത് അതിദയനീയസ്ഥിതിയുള്ള മുസ്ലിം കുടുംബങ്ങളുടെല്ലോ അവരെയൊന്നും സഹായിക്കേണ്ടേ? ഉവ്വാ..അവിടെ പരിവര്‍ത്തനത്തിന് ചെന്നാല്‍ വിവരമറിയും !
    അതുകൊണ്ടെന്തു വേണമെന്നാണു അനൂപ് ഉദ്ദേശിക്കുന്നത് ? പാക്കിസ്ഥാനില്‍ പട്ടാള ഭരണം വന്നാല്‍ നമുക്കും പട്ടാളഭരണം വേണമെന്നാണോ?

    ---------------------------
    അഫ്ഗാനിസ്ഥാന്‍, ഇറാക്ക്, ഇറാന്‍ അങ്ങനെ കിടക്കുകയല്ലേ അതിദരിദ്രരുടെ രാജ്യങ്ങള്‍ അവിടെയൊക്കെയാണ് യഥാര്‍ഥ മിഷനറി പ്രവര്‍ത്തനങ്ങള്‍ നടത്തേണ്ടത് :)

    മുകളില്‍ പറഞ്ഞത് !

    ReplyDelete
  25. അനൂപേ, അനൂ‍പ് കരുതുമ്പോലെ ആഫ്രിക്കന്‍ രാജ്യങ്ങളില്‍ ക്രിസ്ത്യാനികളല്ല ഭൂരിപക്ഷം. മുസ്ലീങ്ങളാണ് പ്രത്യേകിച്ച് വടക്കന്‍ ആഫ്രിക്കന്‍ രാജ്യങ്ങളില്‍ കൂടുതല്‍!

    അതുപോലെ ആഫ്രിക്കന്‍ രാജ്യങ്ങളിലാണ് ഏറ്റവും കൂടുതല്‍ മതപരിവര്‍ത്തനം നടക്കുന്നത്!
    അല്‍ ജസീറ ടിവിയുടെ കണ്ടെത്തല്‍ അനുസരിച്ച് ഒരു വര്‍ഷം 6മില്യണ്‍ മുസ്ലീങ്ങളാണ് ,ക്രിസ്ത്യാനികളായിക്കൊണ്ടിരിക്കുന്നത്, ഒരു മണിക്കൂറില്‍ 617 മുസ്ലീങ്ങളും.

    അതുപോലെ പാശ്ചാത്യ രാജ്യങ്ങളില്‍ ക്രിസ്ത്യാനികളും ഏറെപ്പേര്‍ മതപരിവര്‍ത്തനത്തിനു വിധേയരാവുന്നുണ്ട്.
    പറയാനാണെങ്കില്‍ ഏറെയുണ്ട്.
    ഇന്‍ഡ്യയല്ല ഏറ്റവും കൂടുതല്‍ മത സഹിഷ്ണുതയുള്ള രാജ്യം, മറ്റു മതങ്ങളോടും ആളുകളോടും ഏറ്റവും കൂടുതലസഹിഷ്ണുതയുള്ളവരാണ് നമ്മള്‍ ഇന്‍ഡ്യക്കാര്‍, അത് വെളുത്തവനായാലും കറുത്തവനായാലും പാകിസ്ഥാനിയായാലും ബെംഗ്ലാദേശിയായാലും ലങ്കനായാലും അങ്ങനെ തന്നെ, എന്തിന് മറ്റൊരു സ്റ്റേറ്റുകാരനെ കണ്ടാല്‍ പോലും സ്നേഹത്തോടെ , മര്യാദയോടെ നമ്മള്‍ എത്രപേര്‍ പെരുമാറും അതുകൊണ്ട് സഹിഷ്ണുതയുടെ കണക്ക് ഒക്കെ അവിടെ ഇരിക്കട്ടെ,ലോകം മൊത്തം കണ്ണ് തുറന്ന് കാണൂ നമ്മള്‍ വസിക്കുന്ന പൊട്ടക്കുളം എത്ര ചെറുതാന്ന് മനസിലാവും!

    ReplyDelete
  26. ഒരു സംഘപരിവാര്‍ ഗുണ്ടയായി മുദ്രകുത്തപ്പെടുമോ എന്ന ഭയത്താല്‍,
    ഈ വിഷയത്തില്‍ ഇനി കമന്റാന്‍ ഞാനില്ല :)
    വായനക്കാരനായി ഇവിടെയുണ്ടാകും.

    ReplyDelete
  27. അനൂപ് അവസാനം പറഞ്ഞത് പോയന്റ്. സംഘപരിവാര്‍ ആയി മുദ്രകുത്തപ്പെടുന്നത് പോലും അപമാനകരമായി കരുതുന്ന ആ മനസ്സിന് സല്യൂട്ട്.

    ഒപ്പം അങ്കിളിനോട് 100% യോജിപ്പ്. മതപരിവര്‍ത്തനം തന്നെ എന്തിന്? സത്യത്തില്‍ സ്വമേധയാ മതം മാറുന്നവരെക്കൂടി പിന്തിരിപ്പിക്കുകയാണ് മതമേലധികാരികള്‍ ചെയ്യേണ്ടത്. അല്ലേ, മറ്റ് മതങ്ങളോട് ബഹുമാനമുണ്ടെങ്കില്‍ അങ്ങനെയല്ലേ ചെയ്യേണ്ടത്?

    ReplyDelete
  28. ഒപ്പം അങ്കിളിനോട് 100% യോജിപ്പ്. മതപരിവര്‍ത്തനം തന്നെ എന്തിന്? സത്യത്തില്‍ സ്വമേധയാ മതം മാറുന്നവരെക്കൂടി പിന്തിരിപ്പിക്കുകയാണ് മതമേലധികാരികള്‍ ചെയ്യേണ്ടത്. അല്ലേ, മറ്റ് മതങ്ങളോട് ബഹുമാനമുണ്ടെങ്കില്‍ അങ്ങനെയല്ലേ ചെയ്യേണ്ടത്?

    പണം എന്തിനു പലിശയ്ക്കു കൊടുക്കുന്നു? പലിശയില്ലാതെ കടം കൊടുക്കരുതോ എന്നു പറയുന്നതു പോലയേയുള്ളൂ..

    പലിശയ്ക്കോ അല്ലാതെയോ കടം കൊടുക്കരുത് എന്നു ഒരു കൂട്ടര്‍ നെഞ്ചത്ത് കത്തിയും വച്ചു ഭീഷണിപ്പെടുത്തിയാല്‍ എങ്ങിനെയിരിക്കും?. ഏതാണു ഗൌരവമായ പ്രശ്നം ?

    ReplyDelete
  29. "Vellayani Vijayan/വെള്ളായണിവിജയന്‍ said...

    ഇതിനൊരു പോംവഴി നിര്‍ബന്ധിത മത പരിവര്‍ത്തനം നിയമം മൂലം നിരോധിക്കുക എന്നുള്ളതാണ്.
    വെള്ളായണി വിജയന്‍"


    ഇതിപ്പോഴാണ്‌ കണ്ടത്‌; ചിരിച്ചൊരുവഴിക്കായി...

    അപ്പോള്‍ ഇന്ത്യയില്‍ നിര്‍ബന്ധിതമതപരിവര്‍ത്തനം ഇപ്പോള്‍ നിയമവിധേയമാണെന്നാണോ വെള്ളായണി വിജയന്‍ ധരിച്ചുവച്ചിരിക്കുന്നത്‌? നിര്‍ബന്ധിച്ചൊരാളെക്കൊണ്ട്‌ മൂത്രമൊഴിപ്പിക്കാന്‍ പോലും ആര്‍ക്കും ഈ രാജ്യത്ത്‌ അവകാശമില്ല, പിന്നെയാണ്‌ മതം മാറ്റം! ചരിത്രത്തില്‍ ബിരുദാനന്തരബിരുദമുണ്ടെന്ന് പ്രൊഫെയിലില്‍ കാണുന്നുമുണ്ട്‌.

    നൂറുകണക്കിനു ഗ്രാമീണര്‍ ഹിന്ദുമതത്തിലേക്ക്‌ പുനപ്പരിവര്‍ത്തനം ചെയ്യുന്ന ദൃശ്യം ഇന്നു രാവിലെ എന്‍.ഡി.ടി.വിയില്‍ കണ്ടിരുന്നു. നിര്‍ബന്ധിതമെന്നു പറയാന്‍ വയ്യ, വി.എച്‌.പി. ഇവര്‍ക്ക്‌ ഓപ്ഷന്‍ കൊടുത്തിരുന്നു - ഒന്നുകില്‍ തിരിച്ച്‌ ഹിന്ദുവാകുക അല്ലെങ്കില്‍ കൊല്ലപ്പെടാനോ നാടുവിടാനോ തയ്യാറാകുക.

    "ഒപ്പം അങ്കിളിനോട് 100% യോജിപ്പ്. മതപരിവര്‍ത്തനം തന്നെ എന്തിന്?"

    ഒരാള്‍ക്ക്‌ പശുവിനെക്കണ്ടപ്പോള്‍ തോന്നി; ഇതിനെന്തിനാണ്‌ ചെവി? പാലുകറന്നെടുക്കാന്‍ ചെവിയ്ടെ ആവശ്യമില്ലല്ലോ? ഇതിനെന്തിനാണ്‌ വാല്‌ അതും ആവശ്യമില്ലാത്തതാണല്ലോ?

    വാലും ചെവിയും എന്തിനാണെന്ന് പശുവും മതപരിവര്‍ത്തനം എന്തിനെന്ന് അതിനു വിധേയനാകുന്നവനും തീരുമാനിക്കട്ടെ സര്‍.

    ReplyDelete
  30. ഞാനൊരു സംഘപരിവാറുകാരനല്ല. മതത്തിലും കാര്യമായ വിശ്വാസമൊന്നുമില്ല. ഈശ്വര വിശ്വാസമുണ്ടായിരുന്നത്‌ ഇപ്പോള്‍ ഇല്ലാതായിക്കൊണ്ടിരിക്കുകയാണ്‌. ഒറീസയില്‍ ഹിന്ദു തീവ്രവാദികള്‍ കാട്ടിക്കൂട്ടുന്നതിനെ ന്യായീകരിക്കാനല്ല ഞാന്‍ ശ്രമിച്ചത്‌. എനിക്കു മനസ്സിലാക്കാന്‍ കഴിഞ്ഞ മറ്റൊരു വശം ചൂണ്ടിക്കാട്ടിയെന്നു മാത്രം. ആരൊക്കെ ക്രിസ്‌ത്യാനിയായാലും ഹിന്ദുവായി നിലനിന്നാലും എനിക്കൊന്നുമില്ല. എനിക്കാരും വോട്ടും തരേണ്ട പക്ഷെ, ഇവിടെ ചിലരൊക്കെ ഹിന്ദുവായും ക്രിസ്‌ത്യാനിയായും മുസ്ലീമായും നിലനില്‍ക്കെണ്ടത്‌ ചിലരുടെ ആവശ്യമാണ്‌. കൊച്ചിയില്‍ ക്രിസ്‌ത്യന്‍, ഹിന്ദു പ്രതിനിധികളെന്നവകാശപ്പെടുന്ന ചിലര്‍ ഒത്തു ചേര്‍ന്നപ്പോള്‍ സാക്ഷാല്‍ പിണറായി വിജയന്‍ അസഹിഷ്‌ണുവായത്‌ നാം കണ്ടു. ഇവര്‍ തമ്മില്‍ത്തല്ലി നില്‍ക്കെണ്ടത്‌ പിണറായിയുടെ പാര്‍ട്ടിയുടെകൂടി ആവശ്യമാണ്‌. അതു നാം തിരിച്ചറിയണം.
    ചര്‍ച്ച കൊഴുപ്പിച്ച എല്ലാവര്‍ക്കും നന്ദി. പ്രത്യേകിച്ച്‌ അനൂപ്‌, ഋഷി, നിയാസ്‌......
    മതത്തെപ്പറ്റി പറഞ്ഞാല്‍ കമന്റിന്റെ എണ്ണം കൂടുന്നു. ഇതിലും പ്രസക്തമെന്‌ു ഞാന്‍ കരുതുന്ന എന്റെ മുന്‍ പോസ്‌റ്റുകള്‍ക്ക്‌ കിട്ടിയത്‌ പത്തില്‍ താഴെ കമന്റുകളാണ്‌. ആളുകള്‍ക്ക്‌ താല്‍പര്യം മതത്തിലാണല്ലോ.

    ReplyDelete
  31. Off Topic, sorry.

    മതം - ആ വാക്കിന്‍റെ അര്ത്ഥം തന്നെ ചിന്തനീയംആണ് . അഭിപ്രായം എന്ന ഒരു അര്‍ത്ഥം ഉണ്ട്. ഓരോരുത്തര്‍ക്കും അവരവരുടെ അഭിപ്രായം.

    എന്തിനെ കുറിച്ചുള്ള അഭിപ്രായം? ജീവിതത്തെ കുറിച്ച്, ജന്മത്തെ കുറിച്ച്‌, മനുഷ്യന്‍ എന്താണ് എന്നതിനെ കുറിച്ച്, എങ്ങനെ മനുഷ്യനായി ജീവിക്കണം എന്നതിനെ കുറിച്ച്. അതൊക്കെ ചിന്തിക്കാനും സ്വയം മനസ്സിലാക്കാനും സ്വന്തമായി ഒരു "മതം" രൂപപ്പെടുത്തി എടുക്കാനും സമയം കഴിഞ്ഞാല്‍, നമ്മള്‍ ഏത് വിശ്വാസി ആയാലും ലോകം നന്നാവും.

    യഥാര്‍ത്ഥ മതവിശ്വാസി ഹിന്ദുവോ മുസ്ലിമോ ക്രിസ്ത്യാനിയോ അല്ല. സ്വന്തം ആത്മാവില്‍, സ്വന്തം ധര്മത്തില്‍ വിശ്വാസം ഉള്ളവന്‍ ആണ്.

    ഇപ്പോള്‍ ഏറ്റവും അനഭിമതമായ വിഷയമായി തീര്‍ന്നിരിക്കുന്നു മതത്തെ കുറിച്ചുള്ള ചര്‍ച്ചകള്‍.

    ഓം, അമേന്‍, അള്ളാ. - എല്ലാം ഒന്നു നീട്ടി വിളിച്ചാല്‍ ഒരുപോലെ ഇരിക്കും, ശ്രമിച്ചു നോക്കൂ.

    ReplyDelete

Powered By Blogger

FEEDJIT Live Traffic Feed